Кыргызстанда фермерлер үчүн каржылык сабаттуулук боюнча тренингдер өтүп жатат
Суу ресурстары, айыл чарба жана кайра иштетүү өнөр жайы министрлигине караштуу Кооперация, механизация жана инновациялык технологиялар департаменти БУУнун Азык-түлүк жана айыл чарба уюму(АТАЧУ) менен биргеликте фермерлердин каржылык сабаттуулугун жогорулатууга жана айыл чарба кооперациясын өнүктүрүүгө багытталган тренинг өткөрүп жатат.
Үч күндүк тренинг 25–27-февраль күндөрү Бишкек шаарында Нарын, Ысык-Көл, Талас жана Чүй облустарынын Фермерлерди тейлөө борборлорунун адистери жана айыл чарба кооперативдеринин жетекчилери үчүн уюштурулууда. Буга чейин, 2026-жылдын январь айында, алгачкы үч күндүк тренинг Ош шаарында өтүп, ага Ош, Жалал-Абад жана Баткен облустарынын өкүлдөрү катышкан.
АТАЧУнун адистеринин жетекчилиги алдында катышуучулар кооперациянын негиздери жана финансылык эсеп жүргүзүү, кооперативдердин бухгалтердик отчеттуулугу, бизнес-план түзүү, жеңилдетилген кредит алууга керектүү документтер топтомун даярдоо сыяктуу маселелерди карашты.
Тренингдин негизги бөлүгү чакан жана орто айыл чарба ишканаларына атаандаштыкка жөндөмдүү бизнес-долбоорлорду иштеп чыгууга жана инвестиция тартууга мүмкүнчүлүк берген RuralInvest (РуралИнвест) инструменттер топтомун колдонууга арналды.
Окутуу АТАЧУ тарабынан Суу ресурстары, айыл чарба жана кайра иштетүү өнөр жайы министрлиги менен биргеликте ишке ашырылып жаткан "Фермерлердин жана улуттук каржы мекемелеринин каржылык жана инвестициялык маалымдуулугун жогорулатуу" долбоорунун алкагында уюштурулду. Долбоор айыл чарба кооперативдеринин потенциалын бекемдөөгө багытталган.
2025-жылы долбоордун алкагында Нарын жана Ысык-Көл облустарынан 30дан ашуун айыл чарба кооперативинин өкүлдөрү RuralInvest инструментин колдонуу боюнча окуудан өтүшкөн. Натыйжада алар эл аралык каржы институттарынан жеңилдетилген кредит алуу үчүн алты бизнес-долбоорду ийгиликтүү даярдашкан.
