Мамлекеттик бааны жөнгө салуу сөөксүз этке тиешелүү эмес
Мамлекеттик бааны жөнгө салуу сөөктүү уй жана кой этине тиешелүү экенин, ал эми сөөксүз этке тиешелүү эмес экенин радионун эфиринде Монополияга каршы жөнгө салуу кызматынын адиси Бактыбек уулу Жакшылык билдирди.
Анын айтымында, буйрукта чаралар так көрсөтүлгөн жана алар сөөктүү этке гана тиешелүү.
"Мамлекеттик жөнгө салуу киргизилгенде ал сөөксүз этке жана филе бөлүгүнө жайылтылган эмес. Чаралар сөөктүү этке, анын ичинде сан жана төш бөлүктөрүнө гана тиешелүү болгон", — деп түшүндүрдү ал.
Ал айрым керектөөчүлөр нормага туура эмес түшүнүк берип, жөнгө салуу эттин бардык түрүнө тиешелүү деп кабыл алышканын белгиледи.
Ушуга байланыштуу Монополияга каршы жөнгө салуу кызматына жарандардан бир нече кайрылуу түшкөн. Мекеменин маалыматына ылайык, адистер жер-жерлерге барып, керектөөчүлөргө жана сатуучуларга түшүндүрүү иштерин жүргүзүп, буйруктун талаптары менен тааныштырган.
Кызмат өкүлүнүн айтымында, буйруктун күчү өлкө аймагындагы сөөктүү эт сатылган бардык соода түйүндөрүнө жайылат.
