Кыргызстанда быйыл чакан жана орто бизнестин насыяларын субсидиялоого 399 млн сом бөлүнөт
2026-жылы Кыргызстанда чакан жана орто бизнестин насыяларын субсидиялоого 399 млн сом бөлүнгөнүн "Биринчи радио" эфиринде Экономика жана коммерция министрлигинин бизнес-чөйрө саясаты башкармалыгынын ишкердикти өнүктүрүү бөлүмүнүн башчысы Нурбек Уметалиев билдирди.
Анын айтымында, мамлекет ишкердикти өнүктүрүүнү активдүү колдоп, республикалык бюджеттен бизнеске насыя берүүгө каражат бөлүүдө.
Жеңилдетилген насыялоо программасы 2030-жылга чейин эсептелген жана жыл сайын чакан жана орто бизнеске берилген насыялардын пайыздык ченин субсидиялоону карайт. Жеңилдетилген насыялар төрт банк тарабынан берилет. Каражаттарды инвестициялык максаттарга, жүгүртүү каражаттарын толуктоого жана мурда алынган насыяларды кайра каржылоого пайдаланууга болот.
Мамлекеттик колдоонун негизги багыты өлкөнүн ички дүң продукциясынын болжол менен 50%ын түзгөн чакан жана орто бизнеске багытталган.
Ошондой эле каражаттын 60%ы аймактардагы бизнести колдоого, 40%ы аял ишкерлерди колдоого жумшалат. Экспортко багытталган тармак катары тигүү өнөр жайы артыкчылыктуу багыттардын катарына кирет.
Программанын алкагында стартаптарды колдоо да каралган. Быйыл жалпы насыя портфели 3,7 млрд сомду түзөрү маалымдалды.
