Дүйнөлүк рынокто мунайдын баррелинин баасы дээрлик 100 долларга жетти
Мунайдын бир баррелинин баасы дээрлик 100 долларлык чекке жетти. Бул акыркы төрт жылга жакын убакыттан берки эң жогорку деңгээл. Баанын өсүшү Жакынкы Чыгыштагы ири өндүрүүчүлөрдүн мунай өндүрүшүн кыскартышы жана Перс булуңунда мунай ташуулардын токтоп калышы менен байланыштуу экенин Financial Times жазды.
Маалыматка ылайык, Ирандын Ислам революциясынын сакчылар корпусу Ормуз кысыгын бөгөттөп койгон. Бул кысык дүйнөлүк мунай жеткирүү жолдорунун эң маанилүүлөрүнүн бири болуп эсептелет.
Financial Times басылмасынын жазышынча, эми Сауд Арабиясы, БАЭ, Ирак жана Кувейт мунай өндүрүшүн кыскартышы же айрым кендерди толугу менен жабышы мүмкүн. Себеби Перс булуңунда мунай топтолуп, сактагычтар толуп кетүү коркунучу жаралууда.
Мунай кендерине жана энергетикалык инфраструктурага болгон кийинки чабуулдар дагы жаңы коркунучтарды жаратып, мунай баасынын акыркы төрт жылдагы эң чоң секирик менен өсүшүнө алып келиши мүмкүн деп айтылат макалада.
Эске салсак, Кувейт буга чейин эле айрым кендерде мунай өндүрүшүн кыскарта баштаган. Мунун негизги себеби — Жакынкы Чыгыштагы чыңалуунун күчөшүнө байланыштуу көмүрсутектерди чет өлкөлөргө жеткирүүдө көйгөйлөр жаралып, сактагычтардын толуп кетиши.
Ормуз кысыгы аркылуу дүйнөлүк мунайдын болжол менен 20%ы жана Перс булуңундагы өлкөлөрдөн чыккан суюлтулган жаратылыш газынын 30%ына чейин өтөт. Бул ресурстар Ирак, Сауд Арабиясы, Кувейт, Бахрейн, Катар жана Бириккен Араб Эмираттарынан негизинен Азия рынокторуна жөнөтүлөт.
