Кыргызстан "Ак Илбирс" брендин бардык товарлар жана кызматтар үчүн патенттеди
Кыргызстанда "Ак Илбирс" аттуу жаңы комбинацияланган товардык белги расмий каттоодон өткөнүн радио эфиринде Билим берүү жана инновациялар министрлигинин Экспертиза башкармалыгынын товардык белгилерди экспертизалоо бөлүмүнүн башкы адиси Урмат Сарыпов билдирди.
Брендди каттоо үчүн арыз 2025-жылдын 7-июнунда берилген. Белги комбинацияланган (анда сүрөт жана тексттик бөлүк бар) жана ал товарлар менен кызмат көрсөтүүлөрдүн Эл аралык классификациясынын бардык 45 классы боюнча каттоодон өткөн. Бул дээрлик бардык тармактарды — электроникадан жана азык-түлүктөн тартып ар кандай кызмат көрсөтүүлөргө чейин — камтыйт.
Сарыповдун айтымында, бул товардык белгинин жалгыз укук ээси болуп Кыргызстандын Соода‑өнөр жай палатасы эсептелет. Эми дал ушул Палата бул логотипти башка юридикалык жана жеке адамдар колдонушуна уруксат берүү же тыюу салуу боюнча өзгөчө укукка ээ болот.
Сарыпов белгилегендей, каттоонун негизги максаты — жергиликтүү өндүрүүчүлөрдү аныктоо жана экспорттук продукцияны коргоо.
"Өлкө ичинде биз эми башка мамлекеттерден товарлар алып келинип, аларга жөн гана “Made in KG” деген белгилер чапталып кайра сатылган учурларды токтото алабыз. Улуттук каттоо бул процессти Кыргызстан аймагында көзөмөлдөөгө мүмкүндүк берет", — деп түшүндүрдү адис.
Ал ошондой эле учурда бренд улуттук тартип боюнча гана корголуп жатканын билдирди. "Ак Илбирс" белгиси чет өлкөлөрдө да юридикалык күчкө ээ болуп, тышкы рыноктордо жасалмаларды алдын алуу үчүн аны эл аралык (Мадрид) системасы аркылуу каттоо керек.
Анын айтымында, Соода-өнөр жай палатасында эл аралык арыз берүү планы каралууда. Бул кыргыз брендин система катышкан башка мамлекеттерде да коргоого алып, республиканы экологиялык таза жана сапаттуу продукциянын өндүрүүчүсү катары расмий түрдө таанытууга жардам берет.
