Кыргызстан Кытайга экологиялык таза продукция экспорттоону көбөйтөт
Кыргызстандын соода өкүлү Кытайдын Чэнду шаарында экологиялык таза продукцияны экспорттоо мүмкүнчүлүктөрүн талкуулады. Бул тууралуу Экономика жана коммерция министрлигинен билдиришти.
Экономика жана коммерция министрлигинин Кытай Эл Республикасындагы соода өкүлү Жусубали Торомаматов Чэнду шаарында "Chengdu International Trade Group Co., Ltd." мамлекеттик соода корпорациясынын жетекчилиги менен жумушчу жолугушуу өткөрдү.
Жолугушууда Кыргызстандан Чэнду рыногуна жогорку сапаттагы экологиялык таза продукцияны жеткирүү мүмкүнчүлүктөрү талкууланды. Тараптар логистикалык жана инфраструктуралык мүмкүнчүлүктөрдү колдонуу аркылуу кызматташууну кеңейтүүгө кызыкдар экенин билдиришти.
Кыргыз тарап Кытай рыногу үчүн келечектүү багыттарды сунуштап, Кыргызстанды ишенимдүү өнөктөш катары кароого чакырды.
Өз кезегинде кытай тарап корпорациянын ишмердүүлүгүнүн негизги багыттарын тааныштырды. Алардын ичинде өнөр жайды колдоо, керектөө рыногун өнүктүрүү жана санариптик сооданы кеңейтүү бар.
Жолугушуунун жыйынтыгында тараптар соода-экономикалык кызматташууну мындан ары өнүктүрүү боюнча консультацияларды улантууга макулдашышты.
