Кыргызстан аймактарын өнүктүрүү боюнча 100дөн ашуун программа иштелип чыкты — Экономика министрлиги
Кыргызстанда аймактарды өнүктүрүү боюнча 100дөн ашуун программа иштелип чыкты. Бул тууралуу Экономика министрлигине караштуу Жергиликтүү өз алдынча башкаруу союзунун директорунун орун басары Бакыт Рыспаев радио эфиринде билдирди.
Анын айтымында, программанын негизги максаты — аймактар арасындагы теңсиздикти азайтуу жана дотацияда турган аймактарды өзүн-өзү камсыздай алган деңгээлге жеткирүү.
Рыспаев белгилегендей, Кант жана Өзгөн шаарлары үчүн мастер-пландар даярдалып бүттү. Анда негизинен инфраструктуралык жана башкаруу маселелерин чечүү артыкчылыктуу багыт катары каралган. Учурда документтер бекитүү баскычында турат.
Муну менен катар өлкө боюнча аймактар жана шаарлар үчүн социалдык-экономикалык өнүгүү программалары (СЭӨП) иштелип чыгып, аларды ишке ашыруу үчүн адистер окутулууда.
Программанын алкагында:
- Кара-Суу районунда автоунаа чогултуучу завод курулууда, ошондой эле аккумулятор жана LED чырактарды өндүрүү пландалууда;
- Араван районунда темир-бетон буюмдарын чыгаруучу заводдорду жана кубаттуулугу 9 МВт болгон ГЭСтер каскадын куруу каралууда;
- Өзгөн районунда 600 тонна сыйымдуулуктагы логистикалык борбор куруу пландалууда.
Рыспаевдин айтымында, аймактарды өнүктүрүү үч негизги багыт боюнча жүргүзүлөт: айыл чарба, өнөр жай жана туризм.
