Ишкерлер туруктуулукту жана иштей турган мыйзамдарды камсыздоону өтүнүштү
Кыргызстандын ишкерлери өлкөдө туруктуулукту жана иштей турган мыйзамдарды камсыздоону өтүнүп жатканын JIA бизнес-ассоциациясынын аткаруучу директору "Биринчи радио" эфиринде Аззамбек Жээнбай уулу билдирди.
Анын айтымында, Кыргызстанда мыйзамдардын системалуу иштешин камсыз кылуу зарыл. Ошондо ишкерлер айрым кызмат адамдарына көз каранды болбойт — чакан жана орто бизнес өкүлдөрү маселелерин чечүү үчүн дайыма өлкө жетекчилигине кайрылууга мажбур болбошу керек.
"Биз мыйзамдардын аткарылышы жана сакталуусу камсыз болгон өлкө болушубуз керек. Завод ачуу үчүн ишкер президентке же министрге чуркабашы керек. Эрежелер айыл өкмөтүнүн жана район деңгээлинде эле иштеп, аткарылышы зарыл", — деди Аззамбек Жээнбай уулу.
Ал кошумчалагандай, ишкерлер үчүн негизги фактор — бул туруктуулук жана кабыл алынган эрежелердин алдын ала белгилүү болушу. Мыйзам жөн гана кагаз жүзүндө калбастан, иш жүзүндө да иштеши керек.
"Туруктуулук — бизнеске эң керектүү нерсе. Эгер эрежелер белгилүү болуп, алдыдагы беш жылга чейин өзгөрбөсө, анда инвестор коркпой инвестиция салат", — деп жыйынтыктады эксперт.
