КФБ алтындын экинчи рыногун өнүктүрүүнү көздөйт

Арслан Кененбаев 3-апрелде Кыргыз фондулук биржасында алтын менен сооданын башталышында алтын инвестициялык портфелде маанилүү орунду ээлеши керек экенин билдирди.

Анын айтымында, акыркы 20 жылда алтындын баасы болжол менен 20 эсеге өсүп, доллардан да озуп кеткен.

"Азыр дүйнөдө геосаясий туруксуздук күчөп жатат. Ошондуктан ар бир инвестициялык портфелде баалуу кагаздар менен катар алтын да болушу керек", — деди ал.

Кененбаев белгилегендей, эми алтынды биржа аркылуу сатып алуу жеңилдейт жана аны алуу үчүн физикалык түрдө кайдадыр баруунун кереги жок.

Ал мурдагы жагдайды мисал келтирип, алтын куймаларын сатып алууда коопсуздук жана жеткиликтүүлүк маселелери болгонун айтты. Азыр болсо алтын бир жерде — депозитарийде сакталат, ал эми анын ээси гана өзгөрөт. Анын сөзүнө караганда, эми каалаган адам — Чикагодон, Москвадан, Нарындан же Оштон — телефон, брокер жана платформа аркылуу алтын сатып ала алат.

Кененбаев Кыргызстанда алтын өндүрүшүнүн көлөмү бар экенин айтып, экинчи рынокту өнүктүрүү зарылдыгын белгиледи. Анын айтымында, келечекте алтынды бир гана Кыргызалтын эмес, жарандар өз ара да соода кыла алышы керек.

Ошондой эле ал физикалык ташуунусуз соода жүргүзүү планы тууралуу айтып берди. Мисалы, бир эле 12 кг куйма бөлүктөргө бөлүнүп сатылып, ар кандай инвесторлор анын үлүштөрүнө ээ боло алышат.

Мындан тышкары, зергерлер үчүн да биржа аркылуу өндүрүүчүлөрдөн түз алтын сатып алуу мүмкүнчүлүгүн киргизүү пландалууда.