Сырттан келген кыргызстандыктар инвестициялык долбоорлорго катышып жатат – Р.Сабиров
Акыркы жылдары Кыргызстанга 15–20 миңдей мекендештер кайтып келип, айрымдары инвестициялык долбоорлорду ишке ашырып жатканын радионун эфиринде Инвестициялар боюнча улуттук агенттиктин башчысы Равшанбек Сабиров билдирди.
Анын айтымында, кайтып келген жарандар негизинен курулуш тармагында иштеп, ошондой эле бизнес ачып, аймактарда ар кандай долбоорлорду ишке киргизүүдө.
"15–20 миңден ашуун мекендештерибиз тарыхый мекенине кайтып келишти. Алар активдүү иштеп жатышат, айрыкча курулуш тармагында, ошондой эле инвестициялык долбоорлорду ишке ашырып жатышат", — деди ал.
Равшанбек Сабиров белгилегендей, айрым инвесторлор түздөн-түз келип, көбүнчө жергиликтүү өз алдынча башкаруу органдары менен иштешип, агенттикке кайрылбайт. Анын айтымында, аймактарда буга чейин эле үй канаттуулары фермалары ачылып, мал чарбачылык өнүгүп жатат.
Ал кошумчалагандай, чет өлкөдө тажрыйба топтогон мекендештер Кыргызстанда ишканаларды ачып, жумуш орундарын түзүп жатышат.
Ошондой эле анын маалыматы боюнча, мамлекеттик-жеке өнөктөштүктүн алкагында өлкөдө жалпы суммасы болжол менен 434 млрд сомду түзгөн 90дон ашуун долбоор ишке ашырылып, алардын 60тан ашыгы учурда аткаруу стадиясында.
Долбоорлордун багыттарына жол куруу, бизнес-борборлорду жана социалдык инфраструктура объекттерин, анын ичинде медициналык мекемелерди куруу кирет. Мисал катары ал Өзгөн шаарындагы айланма жолдун курулушун келтирди, бул шаар аркылуу өтүү убактысын кыскартууга мүмкүндүк берген.
