Адылбек Касымалиев иш сапары менен АКШга барат
КРнын Министрлер Кабинетинин Төрагасы Адылбек Касымалиев Вашингтон шаарына иш сапары менен барып, Эл аралык валюта фондунун жана Дүйнөлүк банк тобунун жазгы жыйындарына катышып келет.
Сапардын алкагында ал Дүйнөлүк банктын жогорку жетекчилиги менен, анын ичинде Операциялык ишмердүүлүк боюнча башкаруучу директору Анна Бьерде жана Европа жана Борбордук Азия региону боюнча вице-президенти Антонелла Бассани менен сүйлөшүүлөр пландаштырылган. Жолугушууларда Кыргызстандагы учурдагы долбоорлордун жүрүшү жана Камбарата ГЭС-1 куруу сыяктуу стратегиялык демилгелер талкууланат.
Мындан тышкары, Адылбек Касымалиев дүйнөлүк технологиялык компаниялар — Meta, Oracle, NVIDIA жана SpaceX жетекчилери менен жолугуп, санариптик өнүгүү жана жасалма интеллектти жайылтуу маселелерин талкуулайт.
Ошондой эле сапардын жүрүшүндө АКШ Президенти Дональд Трамп администрациясы менен эки тараптуу консультациялар өткөрүлөрү пландалууда.