Мамлекет башчы Араванда эл менен жолугушуп, алардын суроолоруна жооп берди
Президент Садыр Жапаров бүгүн Ош облусунун Араван районунда жергиликтүү актив жана тургундар менен жолугушуу өткөрдү. Иш-чара ачык суроо-жооп форматында өтүп, анда аймактагы негизги көйгөйлөр көтөрүлдү.
Жолугушууда тургундар мектеп жана бала бакча куруу, билим берүү мекемелерин кеңейтүү, жер тилкелерин берүү, ирригация системасын жакшыртуу, газдаштыруу, медициналык тейлөө жана жол инфраструктурасы боюнча маселелерди ортого салышты. Ошондой эле айыл чарба жерлерин сугаруу, социалдык объектилерди бүтүрүү жана коммуналдык тармактарды модернизациялоо зарылдыгы айтылды.
Президент тиешелүү мамлекеттик жана жергиликтүү органдарга ар бир кайрылууну тыкыр карап чыгып, кыска мөөнөттө чечүү боюнча тапшырма берди. Ал өлкө боюнча сугат суу маселесин чечүүгө багытталган суткалык жана декадалык жөнгө салуучу бассейндерди куруу иштери жүрүп жатканын белгиледи.
Мындан тышкары, жер ресурстарын сарамжалдуу пайдалануу маанилүү экенин айтып, турак жай маселесин чечүү үчүн көп кабаттуу үйлөрдүн курулушу күчөтүлөрүн билдирди. Билим берүү тармагында инвесторлорго жер тилкелерин кайтарымсыз берүү аркылуу жаңы мектеп жана бала бакчаларды куруу колдоого алынарын кошумчалады.
Жолугушуунун жыйынтыгында Мамлекет башчысы бардык кайрылуулар көзөмөлдө экенин белгилеп, ар бир маселе боюнча конкреттүү чечимдер кабыл алынарын айтты.
