Кыргызстандык ишкерлер Вашингтондогу инвестициялык форумга катышат
Америкалык соода палатасынын иши алкагында Кыргызстандан бизнес-делегация түзүлүп, АКШнын Вашингтон шаарында 3–6-май күндөрү өтө турган ири инвестициялык форум — SelectUSA Investment Summitга катышат.
Бул тууралуу Америкалык соода палатасынын аткаруучу директору Алтынай Асанова 16-апрелде радио эфиринде билдирди.
Анын айтымында, форум АКШнын Соода министрлиги тарабынан уюштурулуп, АКШнын 50 штатынын инвестициялык мүмкүнчүлүктөрү менен тааныштырган ири аянтча болуп эсептелет.
Кыргызстандык ишкерлер бул сапардын алкагында:
- ар кандай штаттардагы инвестициялык мүмкүнчүлүктөр менен таанышат;
- бизнес байланыштарды түзүшөт;
- келишимдерди талкуулашат;
- технологиялар менен таанышып, тажрыйба алышат;
- кызматташтык тууралуу меморандумдарга кол коюшат.
Палатанын өкүлдөрүнүн айтымында, мындай форумдар Кыргызстан менен АКШнын ортосундагы экономикалык кызматташтыкты акырындап бекемдөөгө өбөлгө түзөт жана бизнес үчүн жаңы мүмкүнчүлүктөрдү ачат.
