Кызыл-Кыя шаарында жаңы муниципалдык базар курулуп жатат
Президенттин Баткен облусундагы өкүлү Мамыржан Рахимов базардын курулушу менен жеринен таанышты.
Аталган долбоор Баткен облусун өнүктүрүүгө багытталган 500 млн сомдук республикалык бюджеттин алкагында каржыланып жатат. Анын ичинен 80 млн сом каражат бөлүнүп, базардын аймагында негизги инфраструктуралык иштер аткарылды. Тактап айтканда, ички жолдор, тротуарлар, лотоктор, электр мамычалары орнотулуп, саркынды суу системасы, көмөкчү чордон, таза суу тармактары тартылып, айланасы тосулду.
Учурда долбоордун кийинки этабын ишке ашыруу үчүн мамлекеттик-жеке өнөктөштүк механизмин колдонуу каралууда. Бул багытта тиешелүү сынак жарыяланып, инвесторлорду тартуу иштери жүргүзүлүп жатат.
Белгилей кетсек, базардын жалпы сметалык баасы 1 млрд сомго чейин бааланууда. Долбоор толук ишке ашкан соң, шаар тургундары үчүн заманбап, ыңгайлуу соода аянтчасы түзүлүп, ишкерлерге кеңири мүмкүнчүлүктөр ачылат. Мындан тышкары, жаңы жумуш орундары түзүлүп, шаар экономикасынын өнүгүшүнө өбөлгө болот.
