Жарым жылдык жыйынтык: Жалал-Абадда жумушсуздук кыскарып, өндүрүш өстү
Жалал-Абад облусунда 2026-жылдын биринчи жарым жылдыгындагы социалдык-экономикалык өнүгүүнүн жыйынтыктары боюнча жыйын өттү. Бул тууралуу облусттук өкүлчүлүктөн билдиришти.
Жыйынды президенттин Жалал-Абад аймагындагы ыйгарым укуктуу өкүлү Тилек Текебаев өткөрдү. Ага райондук мамлекеттик администрациялардын башчылары, шаар мэрлери, айыл өкмөт жетекчилери жана облустук мекеме-уюмдардын өкүлдөрү катышты.
Маалыматка ылайык, 2026-жылдын алгачкы алты айында облуста өнөр жай өндүрүмүнүн көлөмү 32 млрд 242,5 млн сомду түздү. Ал эми айыл чарба өндүрүмү 26 млрд 35,1 млн сомго жетти.
Ошондой эле аймакта 19 ири инвестициялык долбоор ишке ашырылып жатканы белгиленди. Алардын тогузу Эгемендүүлүк күнүнө карата пайдаланууга берилет. Долбоорлорго 36 млн доллардан ашык инвестиция тартылып, 280 жаңы жумуш орду түзүлөт.
Мындан тышкары, ымыркайлар жана энелер арасындагы өлүмдөрдү азайтуу, дарыгерлердин жетишсиздигин чечүү, жашы жете электер арасындагы укук бузуулардын алдын алуу жана жалпы республикалык тестирлөөнүн жыйынтыктарын жакшыртуу боюнча тапшырмалар берилди.
Социалдык колдоо багытында жарым жыл ичинде облус боюнча 2 146 үй-бүлөгө 150 миң сомдон контракт берилген. Ошондой эле расмий жумушсуздардын саны өткөн жылга салыштырмалуу 1 461 адамга азайып, 9 605 адамды түзгөн.
