Папан чакан ГЭСинин курулушу уланууда
Ош облусунун Кара-Суу районунда кубаттуулугу 27 МВт болгон "Папан" чакан гидроэлектр станциясынын курулушу улантылууда. Бул тууралуу Энергетика министрлигинин маалымат кызматынан билдиришти.
Учурда төмөнкү иштер аткарылды:
- Гидроэлектр станциясынын имараттары курула турган аймакка чейинки узундугу 8 чакырымды түзгөн убактылуу жол курулду;
- Папан суу сактагычынын чөйчөгүндө суу алуучу курулманы куруу үчүн жер тилкеси бөлүнүп берилди;
- ГЭСтин имаратын жана 110 кВ чыңалуудагы ачык бөлүштүрүүчү түзүлүштү (ОРУ-110 кВ) камтыган өндүрүштүк түйүндү куруу үчүн жерлерди бөлүү жана трансформациялоо боюнча иштер жүрүп жатат;
- Курулуш мезгилинде электр энергиясын пайдалануу үчүн техникалык шарттар иштелип чыгып, макулдашылды;
- Папан ГЭСинен "Узловая – Беш-Мойнок" 110 кВ аба чубалгысынан электр берүү үчүн таянычтарды орнотууга керектелүүчү жер тилкелерин бөлүү маселелери каралууда.
Мындан тышкары, долбоордук-сметалык документация иштелип чыгып, курулуштун алдын ала планы аныкталды, суу сактагычтын аймагына кирүүгө уруксат алынды жана инженердик изилдөөлөр жүргүзүлүүдө.
Эске салсак, Папан ГЭСинин капсула салуу аземи 2024-жылдын 5-октябрында болуп өткөн.
