Кытай кысылган аба менен энергия иштеп чыккан ири системаны ишке киргизди
Кытай дүйнөдөгү эң ири кысылган аба менен энергия сактоо жабдыгын пайдаланууга берди. "Объект Цзянсу провинциясында жайгашкан жана өлкөнүн "жашыл" энергетикага өтүүсүн колдоо үчүн энергияны топтоо системаларын өнүктүрүү стратегиясынын маанилүү бөлүгү болуп калды" деп маалымдайт Bloomberg.
Курулушка катышкан Harbin Electric Corp. компаниясынын маалыматына ылайык, аталган жабдыктын кубаттуулугу 2400 МВт·саат түзөт. Ал 600 МВтка чейин электр энергиясын бере алат, бул болжол менен 600 миң үй чарбасынын жылдык электр керектөөсүн камсыздоого жетиштүү.
BloombergNEF белгилегендей, кысылган аба аркылуу энергия сактоо технологиялары эң үнөмдүү жана узак мөөнөттүү чечимдердин бири болуп эсептелет. Алардын иштөө принциби электр энергиясына суроо-талап аз болгон учурда абаны жер астындагы резервуарларга кысым менен айдап сактоого, ал эми жүктөм жогору болгон маалда аны кайра бошотуп, турбиналарды айлантуу аркылуу электр энергиясын өндүрүүгө негизделет.
Мындай долбоорлордун өнүгүшү Кытайда жаңылануучу энергетиканын ыкчам өсүшү менен байланыштуу. Өлкөнүн бийлиги 2027-жылга чейин 180 ГВттан ашык жаңы кубаттуулуктарды ишке киргизүүнү пландап жатат. Бул болсо аккумулятордук энергия сактоо системаларынын да, ошондой эле альтернативдүү технологиялардын, анын ичинде кысылган аба негизиндеги энергия сактоо ыкмаларынын да активдүү өнүгүшүнө түрткү болууда.
