Ысык-Көлдө күн электр станцияларынын курулушу активдүү жүрүүдө
Министрлер Кабинетинин Төрагасы Адылбек Касымалиев Ысык-Көл облусуна иш сапары менен барып, кайра жаралуучу энергетика тармагындагы бир нече маанилүү долбоордун ишке ашырылышын карап чыкты. Бул тууралуу Өкмөттүн басма сөз кызматынан билдиришти.
Иш сапардын алкагында Адылбек Касымалиев Тору-Айгыр айылында "Бишкек Солар" ЖЧКсы тарабынан курулуп жаткан күн электр станциясын текшерди. Курулуш иштеринин 80%га аткарылганы жана пландалган 36 айлык мөөнөт 24 айга кыскартылганы маалымдалды. Станциянын жылдык өндүрүшү 600 млн кВт/саатты түзөт жана инвестициянын көлөмү 2027-жылдын февралына карата 280 млн АКШ долларына жетет. Алгачкы 100 МВт кубаттуулуктагы фазаны 2026-жылдын августунда, кийинки фазаларды 2027-жылдын августунда ишке киргизүү пландалууда.
Андан сырткары, Адылбек Касымалиев вьетнамдык "Рокс Энержи Глобал" компаниясы тарабынан Кызыл-Орук айылында курулуудагы "Ысык-Көл-1" күн электр станциясы менен таанышты. Бул масштабдуу долбоор жалпы кубаттуулугу 1 900 МВт, инвестиция көлөмү 1,4 миллиард АКШ доллары, жыл сайын 3,6 миллиард кВт/саат экологиялык таза электр энергиясын өндүрөт деп күтүлүүдө. Станциянын курулушу 2028-жылы бүткөрүлөт.
Адылбек Касымалиев инвесторлордун активдүүлүгүн жана долбоорлорду ишке ашыруу темпин жогору баалап, мамлекеттин инвестицияларды колдоо жана туруктуу өнүгүүнү камсыз кылуудагы даярдыгын белгиледи.
Бул иш сапар Кыргызстандын энергетикалык секторундагы инвестициялык долбоорлордун натыйжалуу жана ылдам ишке ашышын көрсөтүп, өлкөнүн макроэкономикалык көрсөткүчтөрүн бекемдөөгө багытталган.
