"Күн-Туу" көмөкчордонунун кубаттуулугу 50 МВАга чейин көбөйтүлөт
Чүй облусунда энергетикалык объекттерди куруу жана модернизациялоо долбоорлору ишке ашырылууда. Бул тууралуу Энергетика министрлигинен билдиришти.
Учурда 250 МВА 110/35/10 кВ "Күн-Туу" көмөкчордонуна экинчи кезектеги курулуш иштери башталды. Долбоордун алкагында кубаттуулугу 25 МВА болгон күч трансформатору орнотулат. Натыйжада көмөкчордондун кубаттуулугу 50 МВАга чейин жогорулап, анын өткөрүү мүмкүнчүлүгү кыйла артат.
Курулуш-монтаж иштеринин алкагында төмөнкү иштер аткарылат:
- 110 кВ өчүргүчүн орнотуу;
- 110 кВ ажыраткычтарды монтаждоо;
- 7 даана КРУН уячасын орнотуу;
- 110 кВ ток жана чыңалуу трансформаторлорун монтаждоо;
- жерге туташтыруу жабдууларын орнотуу;
- 110 кВ ашыкча чыңалуудан коргоочу чектегичтерди орнотуу.
Бул иштер электр энергиясы менен камсыздоонун ишенимдүүлүгүн жогорулатып, көмөкчордондун кубаттуулугун арттырууга жана Чүй облусунун энергетикалык инфраструктурасын туруктуу өнүктүрүүгө шарт түзөт.
Аталган долбоорду 2026-жылдын аягына чейин ишке ашыруу пландалууда.
