"Бала ырысы" жөлөк пулун берүү процесси автоматташтырылат
"Бала ырысы" мамлекеттик жөлөк пулун берүү процесси автоматташтырылат. Бул тууралуу Эмгек, социалдык камсыздоо жана миграция министринин биринчи орун басары Камчыбек Досматов "Биринчи радионун" түз эфиринде билдирди.
Анын айтымында, жөлөк пулду алуу тартибин мүмкүн болушунча жөнөкөйлөтүү, жарандардын убаракерчилигин азайтуу жана бюрократиялык тоскоолдуктарды кыскартуу боюнча иштер жүргүзүлөт.
Президенттин жарлыгын ишке ашыруу максатында 1-июлга чейин жаңы жөлөк пулду берүү боюнча жол-жоболор жана механизмдер иштелип чыгат. Ошондой эле үй-бүлөлөр үчүн процессти жеңилдетүү максатында электрондук модул иштеп чыгуу пландалууда. Ага ылайык, бала төрөлгөндөн тартып жөлөк пул автоматтык түрдө дайындалып, каражат ата-энелердин эсебине түшүп турат.
Бул багытта техникалык тапшырмаларды иштеп чыгуу үчүн атайын жумушчу топ түзүлдү. Анын алкагында "Кызмат", "Түндүк" мекемелеринин өкүлдөрү, мамлекеттик органдар жана программисттердин катышуусунда кеңешме өткөрүлөрү белгиленди.
Белгилей кетсек, буга чейин Президент Садыр Жапаров "Бала ырысы" жаңы мамлекеттик жөлөк пулун киргизүү тууралуу жарлыкка кол койгон. Ага ылайык, үч жашка чейинки ар бир балага ай сайын 1200 сом өлчөмүндө жөлөк пул төлөнөт.
