Кыргызстанда быйыл 13 чакан ГЭС ишке киргизилет
Президент Садыр Жапаров энергетика тармагын өнүктүрүү жана альтернативдүү энергия булактарын көбөйтүү боюнча Энергетика министрлигине бир катар тапшырмаларды койгон.
Ага ылайык, энергетика министри Таалайбек Ибраевдин жетекчилиги алдында калкты электр энергиясы менен үзгүлтүксүз камсыз кылуу жана энергетикалык дефициттен чыгуу максатында ири долбоорлор ишке ашырылууда.
Министрликтин маалыматына ылайык, 2026-жылы жалпы кубаттуулугу 81,03 МВт болгон 13 чакан ГЭСти пайдаланууга берүү пландалууда. Алар жылына болжол менен 348,3 млн кВт/саат электр энергиясын өндүрөт.
Чакан ГЭСтер Чүй, Ысык-Көл, Жалал-Абад, Талас, Ош, Баткен жана Нарын облустарында курулууда.
Эске салсак, 2021-2025-жылдары өлкөдө жалпы кубаттуулугу 109,8 МВт болгон 27 чакан ГЭС ишке берилген. Алар жылына 427 млн кВт/саат электр энергиясын өндүрөт.
Мындан тышкары, 2026-2030-жылдары жалпы кубаттуулугу 421,26 МВт болгон 48 чакан ГЭСти ишке киргизүү пландалууда.
Энергетика министрлиги белгилегендей, бул долбоорлорду ишке ашыруу аркылуу жакынкы жылдары Кыргызстанды электр энергиясын импорттоочу эмес, экспорттоочу өлкөлөрдүн катарына кошуу максат кылынууда.
