Асыл тукум мал чарбасын өнүктүрүүгө 3% менен жеңилдетилген насыя берилет
Суу ресурстары, айыл чарба жана кайра иштетүү өнөр жайы министрлиги иштеп чыккан долбоордун негизинде мамлекеттик "Элдик Банк" асыл тукум мал чарбасын колдоого багытталган жеңилдетилген насыялоо программасын ишке киргизди. Бул тууралуу ведомстводон билдиришти.
Программа боюнча пайыздык чен жылына 3%ды (ЖПЧ – 3,04%) түзөт. Жеңилдетилген насыя Министрлер Кабинети бекиткен тизмедеги асыл тукум заводдорго, фермердик чарбаларга, айыл чарба өндүрүүчүлөрүнө, жеке ишкерлерге, асыл тукум мал импорттоочуларга жана уруктандыруу техниктерине берилет.
Каржылоо төмөнкү багыттарды камтыйт:
- асыл тукум мал сатып алуу;
- чарбаларды модернизациялоо;
- мал чарба объектилерин куруу жана реконструкциялоо;
- заманбап технологияларды киргизүү.
Программа ири мүйүздүү малдын ала-тоо, герефорд, голштин, симментал, айшир, бура швиц жана галловей породаларын багууну колдойт.
Насыянын шарттары:
- суммасы — 20 млн сомго чейин (уруктандыруу техниктери үчүн 2 млн сомго чейин);
- мөөнөтү — 60 айга чейин;
- жеңилдик мөөнөтү — 6 ай;
- 500 миң сомго чейин — күрөөсүз;
- күрөө жетишсиз болгон учурда Гарантиялык фонддун кепилдиги каралган.
Банктын маалыматына ылайык, программа агрардык сектордун туруктуу өнүгүшүнө өбөлгө түзүп, ата мекендик продукциянын атаандаштыкка жөндөмдүүлүгүн жогорулатууга багытталган.
Кошумча маалыматты "Элдик Банктын" филиалдарынан жана расмий сайтынан алууга болот.
