Жумгалдыктар «Росатом» уран калдыктарын рекультивациялоо иштеринин деңгээлине нааразы
Нарын облусунун, Жумгал районунун активисттери россиялык «Росатом» тарабынан уран калдыктары герметикалык унаалар менен эмес ачык ташылып, талаптар жана нормалар сакталбай жатканын айтышты. Маселе Жогорку Кеңеште «Росатомдун» өкүлдөрүнүн, Жумгал районунун тургундарынын катышуусунда жыйынында көтөрүлгөн.
Такталгандай, жыйында Миң-Куштагы уран калдыктарын рекультивациялоо маселеси талкууланды. Жергиликтүүлөр уран калдыктары герметикалык унаалар менен эмес ачык ташылып, талаптар жана нормалар сакталбай жатканын айтышты. Алар элдин саламаттыгына доо кетип жатканын кошумчалап, ташуу ишин токтотууну талап кылды.
«Ушунча жылдан бери уран калдыгы жатат, мындан кийин да зыяны жок болсо жата берсин деп жатат эл. Балдардын мурдунан кан токтобой, ден соолугубуз жабыркап жатканын биз өз денебиз менен сезип жатабыз», - деди активист Райнура Алыкулова.
Активисттер жолдор чаңдап, жумушчуларга атайын кийим берилбегенин кошумчалады. «Росатом» мамлекеттик корпорациясынын өкүлү Сергей Дерябин жооп берип, эгер жергиликтүүлөр рекультивация ишине каршы болсо, анда алар долбоорду токтотуп кетерин, чечим элдин өзүндө экенин белгиледи.
«Биз биринчи кезекте аймактагы радиоактивдүү, техногендик кырдаалды жөнгө салуу үчүн 4 мамлекет келишкенбиз. Тажикстанда бул иштер аягына чыкты. Ал жакта эч кандай каршылыктар болгон жок. Эгер сиздер каалабасаңыздар, биз ишти токтотобуз», - деди Сергей Дерябин.
Өзгөчө кырдаалдар министри Бообек Ажикеев өнөктөш мамлекеттерден калдыктарды тазалоо үчүн каражат кыйынчылык менен тартылып келингенин эске салды. Ал мындай долбоордон баш тартуу тарыхый чечим болорун белгилеп, анын алдында терең ойлонууга чакырды.
