Балыкчынын мунай базасынын заттары Ысык-Көлгө агып кетиши мүмкүн. Бул тууралуу Жогорку Кеңештин отун-энергетикалык комплекс, жер казынасын пайдалануу жана өнөр жай саясаты боюнча комитетинин 19-20-июнда Ысык-Көл облусунда көчмө жыйынында белгилүү болду.

Парламенттин маалымат кызматы кабарлагандай, экологдор Ысык-Көл тарапка жер астынан мунай заттары жылжып агып, көлгө жетип калышы мүмкүн экендигин тынчсыздануу менен маалымдашты.

Жергиликтүү тургундар тарабынан бир нече жылдардан бери мунай базасын шаардын аймагынан сыртка көчүрүү маселеси көтөрүлүп келгендигин эске алып, депутаттар аталган маселе боюнча министрлер кабинетине мекемелер аралык комиссия түзүүнү сунуштоо тууралуу чечим кабыл алышты.