Ала-Арчада дүйнөлүк деңгээлдеги родельбанддын курулушу башталды
Ала-Арча мамлекеттик жаратылыш паркында Кыргызстандагы алгачкы родельбандын курулушу башталды. Бул тууралуу Президенттин иш башкармалыгынын башчысы Каныбек Туманбаев билдирди.
Долбоор Президент Садыр Жапаровдун тапшырмасынын негизинде ишке ашууда. Родельбанд дүйнөгө белгилүү Германиянын “Wiegand” компаниясы тарабынан курулат.
Жаңы родельбанддын узундугу 1200 метрди түзөт, 36 чана орнотулат жана саатына 500 адамды тейлей алат.
Туманбаев бул долбоордун туризмди өнүктүрүүдөгү маанилүүлүгүн белгиледи:
"Быйыл биз өлкө тарыхында биринчи жолу асма жолунун курулушун баштадык. Аны дүйнөгө белгилүү “Doppelmayr” компаниясы ишке ашырууда жана жакынкы күндөрү пайдаланууга берилет. Бул – туризмди өнүктүрүүдө чоң кадам. Бүгүн башталган Родельбандын курулушу ушул багыттагы маанилүү долбоорлордун бири",- деди.
Бул ири долбоорлор Кыргызстандагы туризмди жаңы деңгээлге чыгарып, чет элдик коноктор үчүн заманбап инфраструктура түзүүгө өбөлгө болот.
