Чүйдө мөмө-жемиштер IQF технологиясы менен кайра иштетилип жатат
Суу ресурстары, айыл чарба жана кайра иштетүү өнөр жайы министри Бакыт Төрөбаев Чүй облусунун Москва районунда жайгашкан “Кыргызцентрпродукт” ишканасына барып, анын ишмердүүлүгү менен таанышты. Бул тууралуу министрликтин басма сөз кызматы билдирди.
“Кыргызцентрпродукт” — жашылча жана мөмө-жемиштерди кайра иштетип, тоңдуруу жана таңгактоо боюнча өлкөдөгү алдыңкы ишканалардын бири. Өндүрүш процесстеринде Европанын заманбап технологиялары колдонулуп, продукциянын сапаты жана азыктык баалуулугу жогорку деңгээлде сакталат.
Ишканада чийки затты кабыл алуу, иргөө, жууп-тазалоо, туурап кесүү, IQF ыкмасы менен тоңдуруу, таңгактоо жана даяр продукцияны сактоо өндүү толук циклдүү өндүрүш линиялары иштейт.
“Кыргызцентрпродукт” ишканасынын продукцияларынын ассортименти:
Тоңдурулган жашылчалар: брокколи, гүл капуста, болгар калемпири, помидор, баклажан ж.б.;
Жемиш жана мөмөлөр: алча, кара өрүк, кулпунай, малина ж.б.;
HoReCa жана чекене соода үчүн жашылча-мөмө аралашмалары.
Продукциялар HACCP жана ISO 22000 сыяктуу эл аралык сапат жана коопсуздук стандарттарына ылайык өндүрүлөт. Ишкана негизинен Кыргызстандын дыйкан чарбаларынан чийки зат алып, экологиялык таза жана жаңы продукция менен камсыздоону максат кылат.
