“Агро Куш” ЖЧКсы келечекте жылына 15 миң тонна тоок этин өндүрөт
Суу ресурстары, айыл чарба жана кайра иштетүү өнөр жайы министри Бакыт Төрөбаев Кемин шаарындагы «Агро Куш» ЖЧКсынын тоок этин өндүрүүгө багытталган «Кемин» заманбап канаттуулар чарбасынын курулушуна капсула салганы министрликтин басма сөз кызматы маалымдады.
«Агро Куш» ишканасы инкубация, тоют өндүрүү, бройлер өстүрүү, тоок союу, этин кайра иштетүү жана даяр продукцияны таркатуу сыяктуу толук өндүрүш циклин ишке ашырат. Компанияда жергиликтүү тургундардан турган 600дөн ашык жумушчу иштейт.
“Агро Куш” ЖЧКсынын келечекте компаниянын учурдагы кубаттуулуктарын кеңейтүүгө багытталган “Кемин”өндүрүштүк комплексин түзүү долбоору бар. Ал Кемин районунда жаңы инкубаторийди, тоок өстүрүүчү аянттарды, канаттуулар үчүн тоют чыгаруучу заводду жана даяр продукцияны сактоочу кампаны курууну камтыйт.
Комплекс ишке берилгенден кийин компаниянын жалпы өндүрүштүк кубаттуулугу 29 пайызга көбөйүп, жылына болжол менен 15 миң тонна тоок этине жетет. Бул ар жылы 10 миллиондон ашык бройлер тоокөндүрүлөт деген сөз. Ал эми комбикорм өндүрүшүнүн көлөмү 28 миң тоннадан 115 миң тоннага чейин өсөт.
