Бишкекте 3-ноябрдан тарта жылытуу сезону башталат
Бишкек шаарынын муниципалитетинен билдиришкендей, 2025-жылдын 3-ноябрынан баштап борбор калаада 2025–2026-жылдардагы жылытуу сезону старт алат.
Ошол күнү кечинде Бишкек ЖЭБ кызматкерлери жылуулукту өндүрүп, аны “Бишкек жылуулук тармагы” муниципалдык ишканасына өткөрүп берүү процессин баштайт. Бардык жабдуулар күчөтүлгөн режимде иштеп, техникалык кызматкерлер коюлган параметрлерди камсыздоого даяр.
Жылуулукту кошуу этап менен жүргүзүлөт:
1. Социалдык объектилер — мектептер, бала бакчалар, медициналык мекемелер, төрөт үйлөрү жана социалдык коргоо уюмдары;
2. Көп кабаттуу турак үйлөр жана жеке сектор.
Ишканалардын техникалык кызматкерлери мүмкүн болуучу кайрылууларга жана өзгөчө кырдаалдарга ыкчам жооп кайтаруу максатында күчөтүлгөн иш режимине өтүштү.
