Мурдагы Салык кызматынын башчысы жана анын орун басары айыпка жыгылды
Мамлекеттик салык кызматынын мурдагы төрагасы Алтынбек Абдувапов жана анын орун басары Исламбек Кыдыргычов соттун өкүмү менен күнөөлүү деп табылганын Ленин райондук соту билдирди.
Сот аларды Кылмыш-жаза кодексинин "Кызмат абалынан кыянаттык менен пайдалануу" беренеси боюнча айыптуу деп таап, Алтынбек Абдуваповго 400 миң сом, ал эми Исламбек Кыдыргычовго 300 миң сом айып пул салды. Экөөнө тең белгилүү кызматтарды ээлөөгө тыюу салынды.
Мындан тышкары, экс-чиновниктер атайын наамдарынан, класстык чиндеринен жана мамлекеттик сыйлыктарынан ажыратылды. Камакта кармоо түрүндөгү баш коргоо чарасы өкүм мыйзамдуу күчүнө киргенге чейин өлкөдөн чыкпоо тууралуу кол тамгага алмаштырылды.
Иштин дагы бир фигуранты Т.А. "Кызмат абалынан кыянаттык менен пайдалануу" жана "Курал-жаракты мыйзамсыз жүгүртүү" беренелери боюнча күнөөлүү деп табылып, ага 330 миң сом айып пул салынды. Ага карата баш коргоо чарасы өзгөрүүсүз калтырылды.
Эске салсак, 2024-жылдын декабрында УКМК салык кызматындагы электрондук товардык-транспорттук коштомо кагаздарга байланыштуу коррупциялык схема мамлекетке 3,2 млрд сом зыян келтиргенин билдирген. 2025-жылдын июль айында экс-башчынын 55 млн долларлык мүлкү аныкталганы маалымдалган.
