Чүйдө жаңы сквердин эскиздик долбоору иштелип чыкты
Шаар куруу жана архитектура департаментинин Чүй регионалдык башкармалыгынын архитекторлору Аламүдүн районунун Ленин айылында жаңы сквердин эскиздик долбоорун даярдашты. бул тууралуу Курулуш, архитектура жана турак-жай коммуналдык чарба министрлигинен билдиришти.
Долбоор экологиялык талаптарга жана шаар куруу стандарттарына ылайык иштелип, аймактын тургундары үчүн ыңгайлуу эс алуу мейкиндигин түзүүгө багытталган. Ага жашыл зона, жөө жүргүнчүлөр үчүн жолдор, жарыктандыруу системасы, отургучтар жана балдар ойноочу аянтча кирет. Ошондой эле скверге пейзаждык элементтер жана гүлзарлар жайгаштырылып, коомдук кеңистик кооз жана заманбап көрүнүштө болот деп пландалууда.
Архитекторлордун айтымында, жаңы сквер аймактын жашоочуларына таза абада эс алып, социалдык байланыштарды чыңдоого мүмкүнчүлүк түзөт. Эскиздик долбоор жакынкы айларда коомдук талкууга чыгарыла турганы белгиленди.
