Бишкекте көп кабаттуу мыйзамсыз курулуштун маселеси чечилди
Курулуш, архитектура жана турак жай-коммуналдык чарба министри Нурдан Орунтаевдин тапшырмасына ылайык, Мамлекеттик архитектура-курулуш контролдоо департаменти көп жыл мурда мыйзамсыз курулуп калган көп кабаттуу үйлөрдүн маселесин чечүү боюнча иш жүргүзүүдө.
Министрликтин маалыматына ылайык, департаменттин директору Эрназарбек Суеркулов Бишкек шаарынын Курчатов көчөсү 28/1 дарегинде жайгашкан 9 кабаттуу турак үйдүн жашоочулары менен жолугуп, объектинин пайдаланууга берүү боюнча шайкештик актысын (акт ввода в эксплуатацию) тапшырды.
Аталган объект “Алтын казык плюс” ЖЧКсы тарабынан мыйзамсыз курулуп, пайдаланууга өткөрүлгөн эмес. Мунун айынан жашоочулар батирлерин өз атына каттай албай, кыймылсыз мүлккө тиешелүү документтерди алуу процессинде кыйынчылыктарга туш болуп келген.
