Кыргызстанда каржы пирамидасын уюштуруучулардын бири кармалды
ИИМдин Кылмыш иликтөө башкы башкармалыгынын жүргүзгөн ыкчам-издөө иш-чараларынын жүрүшүндө, «SkyWay» жана «Sky World Community» компаниянын куратору 1973-жылы туулган И.П. аттуу жаран кармалып, камакка алынды. Компания КРнын аймагында Бишкек менен Ош шаарларынын ортосунда «асман көпүрөлөрүн» куруу боюнча ири инвестициялык долбоорго катышууну убада кылып, жарандарга жогорку пайда аласыңар деген убада менен долбоорго акча каражатын салуу сунушталган.
Чыныгы инвестициялардын көрүнүшүн жаратуу максатында, катышуучуларга атайын мобилдик тиркеме берилип, анда салынган сумманын көлөмү көбөйүп жаткандай жалган маалымат көрсөтүлгөн. Чындыгында жарандардан чогулган бардык акча каражаттары уюштуруучулардын жеке пайдасы үчүн колдонулган.
Ички иштер министрлиги «SkyWay» жана «Sky World Community» компанияларынын ишмердүүлүгүнөн жабыр тарткан бардык жарандарды жакынкы аймактык милиция бөлүмдөрүнө кайрылууга же төмөнкү телефондор аркылуу байланышууга чакырат: 0505 102 612, 0703 686 883 же 102.
