Саламаттык сактоо министрлиги 4 кабаттуу мектептерди салууну демилгеледи
Кыргызстанда 4 кабаттуу мектептерди куруу маселесин Саламаттык сактоо министрлиги демилгелеп чыкты.
Министрлик белгилегендей, 12 жылдык билим берүү модели бала бакчалардагы мектепке чейинки даярдоо топторун айзатканы менен 1-класска баруучулардын санын көбөйткөн. Бул өз кезегинде жалпы билим берүү мекемелеринин инфраструктурасын даярдоону, алардын материалдык-техникалык базасын жакшыртууну жана керектүү окуу жана башка жабдыктар менен камсыз кылууну талап кылат.
Андыктан калк жыш жайгашкан жана бош жерлер чектелүү аймактарда 4 кабаттуу мектептерди куруу максатка ылайык болот. Ошону менен бирге эле 4-кабатта класстар эмес, кызматтык, чарбалык, рекреационалдык жана кошумча бөлмөлөр жайгашышы керек.
Ашкана, китепкананы, спорттук, бий жана жыйындар залын табийгый жана жасалма жарыктандыруу, тиешелүү температуралык режим менен желдетүү, ошондой эле санитардык-гигиеналык талаптар сакталган шартта эң төмөнкү кабатта жайгаштырса болот.
Эске салсак, азыр мыйзам боюнча 3 кабаттуу гана мектеп курууга уруксат берилген.
