Сокулуктагы мыйзамсыз курулушка 800 миң сом айып салынды
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаменти тарабынан Сокулук районунда жайгашкан “ЛАХОР СТИЛ МИЛС” ЖЧКсына пландан тышкаркы текшерүү жүргүзүлдү. Бул тууралуу министрликтин басма сөз кызматынан билдиришти.
Текшерүүнүн жүрүшүндө Шопоков шаарындагы ишканада долбоордук жана уруксат берүүчү документтери жок даяр продукция сактоочу кампаны куруу жана куйма цехин реконструкциялоо фактылары аныкталды.
Мыйзам бузуулар үчүн ишканага 400 миң сом айып пул салынган, бирок ал белгиленген мөөнөттө төлөнбөгөндүктөн, кошумча 400 миң сом туум эсептелип, жалпы сумма 800 миң сомго жетти. Материалдар Сокулук райондук мажбурлап аткаруу кызматына жөнөтүлдү.
Мындан тышкары, башкармалык сотко өз алдынча курулган кампаны бузуу жана цехтин ишин тиешелүү уруксаттар алынганга чейин токтотуу талабы менен доо арыз берди.
