Кыргызстан Борбор Азияда "Бирдиктүү ден соолук" программасынын теңтөрагасы болду
Кыргызстандын ветеринария, мал чарба, жайыт жана тоют кызматтарынын адистери Тажикстанда өткөн Борбор Азия өлкөлөрүндөгү пандемияга каршы жана азык-түлүк системаларынын туруктуулугуна арналган регионалдык конференцияга катышты. Бул тууралдуу Айыл чарба министрлигинин басма сөз кызматынан билдиришти.
Иш-чаранын алкагында "Бирдиктүү ден соолук" программасы боюнча Регионалдык координациялык кеңеш (РКК) түзүлүп, Кыргызстан анын теңтөрагасы болуп шайланды. Кеңеш адамдын, жаныбарлардын жана айлана-чөйрөнүн саламаттыгын камсыздоо боюнча өлкөлөр ортосундагы кызматташтыкты өнүктүрүүгө багытталган.
Конференцияда РККнын биринчи жыйынынын протоколу кол коюлуп, программаны ишке ашыруунун негизги багыттары белгиленди. Кыргызстан өзүнүн улуттук координациялык механизмин тааныштырды, ал жугуштуу оорулар жана пандемияларга даярдыкты күчөтүүгө арналган.
"Бирдиктүү ден соолук" ыкмасы көп тармактуу болуп, дарыгерлердин, ветеринарлардын, экологдордун жана мамлекеттик органдардын күч-аракетин бириктирет. Бул ыкма зооноздук ооруларды алдын алуу жана көзөмөлдөөгө шарт түзөт.
Эске салсак, 2023-жылы Дүйнөлүк банк жана өнүгүү боюнча өнөктөштөрдүн колдоосу менен Борбор Азия өлкөлөрү "Бирдиктүү ден соолук" боюнча Регионалдык иш-аракеттердин алкагын бекиткен.
