Мэрия: Бишкектеги баш калкалоочу жайлар кышка даяр
Бишкек шаарында күз-кыш мезгилинде туруктуу жашаган жери жок адамдар үчүн убактылуу баш калкалоочу жайлар ишке кирди. Бул тууралуу муниципалитеттен билдиришти.
Октябрь районундагы А. Токомбаев көчөсү, 1а дарегиндеги баш калкалоочу жай 80 адамга ылайыкташкан. Учурда оңдоо иштери аяктап, төшөнчүлөр, дары-дармектер жана бир жолку ысык тамак берүүгө мамлекеттик сатып алуулар жүргүзүлдү. Жылытуу үчүн жергиликтүү бюджеттен 10 тонна көмүр бөлүндү.
Биринчи Май районунда «Коломто» муниципалдык мекемеси 70-100 адамга бир жолку тамак жана түнөк камсыз кылат. Мекеме жылына орто эсеп менен 2000 адамга кызмат көрсөтөт.
Ленин районундагы "Боорукердик борбору" КФ 45 адамга ылайыкталган. Учурда 10 аял жана 12 бала борбордо жашайт, аларга тамак, түнөк жана медициналык жардам көрсөтүлүүдө.
Баш калкалоочу жайларга үй-жайсыздар өздөрү кайрылса болот, ошондой эле милиция жана тез жардам кызматкерлери жеткире алышат. Маалымат жана жардам алуу үчүн: 102, 103 жана "Боорукердик борборунун" байланыш номуру – 64-11-09.
