Токмокто 1905 батирлүү ипотекалык комплекс курулууда
Президенттин Иш башкармалыгынын башчысы Каныбек Туманбаев Токмок шаарындагы ипотекалык турак жай комплексинин курулушу менен таанышты. Аталган комплексте 29 блоктон турган турак жайлар курулууда. Бул тууралуу Президенттин Иш башкармалыгынан билдиришти.
Жалпы долбоорго ылайык:
- 1905 батир курулууда;
- 9 блок 9 кабаттуу, 20 блок 15 кабаттуу;
- ар бир кабатта 5 батир жана ар бирине жеке газ казаны орнотулат;
- турак жайлар борбордук канализацияга туташтырылып, энергияны үнөмдөөчү технологиялар колдонулууда.
Комплекстин аймагында жашоочулар үчүн балдар аянтчалары, спорттук зона, жашыл участкалар жана унаа токтотуучу жайлар каралган. Ошондой эле мектеп жана бала бакча жакын жайгашкан.
Бул турак жай комплекси президент Садыр Жапаровдун жарандарды жеткиликтүү турак жай менен камсыз кылуу демилгесинин алкагында ишке ашып жаткан социалдык долбоор болуп саналат.
Каныбек Туманбаев белгилегендей, курулуш иштери өз убагында жана жогорку сапаттык стандарттарга ылайык бүткөрүлүшү керек. “Бул долбоор мамлекет башчысынын элге берген убадасынын иш жүзүндөгү аткарылышы болуп саналат”, — деди ал.
