"Дордой" базарынын жанындагы көлдүн айланасы көрктөндүрүлөт
Айбек Джунушалиев 16-мартта "Дордой" ассоциациясынын президенти Аскар Салымбеков менен жолугушуу өткөрүп, "Дордой" базарынын аймагын көрктөндүрүү маселесин талкуулады. Айрыкча базардын жанындагы көлгө жана анын айланасына өзгөчө көңүл бурулганын борбор калаанын мэриясынын басма сөз кызматы билдирди.
Мэрдин айтымында, шаар бийлиги бизнести өнүктүрүүнү колдойт, бирок ал системалуу түрдө жана шаардык талаптарды сактоо менен жүргүзүлүшү керек. Ушуга байланыштуу базардын жанындагы көлдүн аймагында масштабдуу көрктөндүрүү иштерин жүргүзүү пландалууда.
Долбоорго ылайык:
- көлдүн айланасын тосмолор менен курчоо,
- көлдү тазалоо,
- анын айланасын тартипке келтирүү,
- сейилдөө үчүн ыңгайлуу аймак түзүү каралган.
Бул аймак базарга келгендер жана шаар тургундары үчүн коопсуз жана жайлуу мейкиндикке айланат.
Базардын инфраструктурасын жакшыртуу алкагында:
- көп кабаттуу унаа токтотуучу жайларды куруу,
- парковка орундарын тартипке келтирүү да каралууда.
Мэр базардын аймагындагы бардык унаа токтотуучу жайларды кайра муниципалитеттин балансына өткөрүп, төлөмдү QR-код аркылуу жүргүзүү системасын киргизүүнү тапшырды.
Аскар Салымбеков билдиргендей, базардын аймагында жол куруу иштери 2026-жылдын 1-апрелинен башталат.
Жолугушуунун жыйынтыгында Айбек Жунушалиев Свердлов райондук администрациясына, муниципалдык менчик башкармалыгына жана жер пайдаланууну көзөмөлдөө башкармалыгына көлдүн айланасын көрктөндүрүүгө жана инфраструктуралык долбоорлорду ишке ашырууга тоскоол болгон объектилерди демонтаждоону камтыган даярдык иштерин бүтүрүүнү тапшырды.
