Global Atomic Quiz – 2025: Бишкекте жаштар атомдук илим боюнча күч сынашты
Бүгүн Бишкектеги Инновация борборунда ядролук физика жана технология боюнча билимди жайылтууга арналган Global Atomic Quiz – 2025 эл аралык викторинасы болуп өттү. Иш-чара «Росатом» мамлекеттик корпорациясынын колдоосу менен уюштурулуп, студенттерге заманбап технологиялар тууралуу билим берүү максатында өткөрүлдү.
Global Atomic Quiz дүйнөнүн 70тен ашык өлкөсүнөн катышуучуларды бириктирген, жаштар арасында илимий билимге кызыгууну арттырууга багытталган эл аралык долбоор болуп саналат.
Кыргызстанда викторина экинчи жолу өткөрүлүп жатат. Ага өлкөнүн алдыңкы университеттеринен жана лицейлеринен студенттер жана окуучулар катышышты.
«Росатом»: Кыргызстан илим жаатында активдүү өнүгүп жатат
Иш-чарада «Росатом» мамлекеттик корпорациясынын Кыргызстандагы өкүлчүлүгүнүн башкы директору Дмитрий Константинов викторинанын маанисине жана Кыргызстан менен Россиянын илимий кызматташтыгына токтолду.
- Бүгүн Кыргызстанда эл аралык билим берүү долбоору — атомдук викторина экинчи жолу өтүп жатат. Бул долбоор 11ден ашуун өлкөнү бириктирип, жыл сайын 40 миңден ашык студенттерди жана жаш адистерди чогултат. Анын негизги максаты — билимди, илимди жана жогорку технологияны жайылтуу, жаштарды заманбап адистиктерге тартуу, — деди Константинов.
Ал белгилегендей, ядролук физика атомдук энергетиканын өзөгү болуп саналат жана бул тармакта билим берүү менен илимий потенциалды өнүктүрүү Кыргызстан үчүн да маанилүү.
- Россия менен Кыргызстандын ортосунда илим жана технология боюнча кызматташуу күн сана өнүгүүдө. Ядролук физика боюнча да биргелешкен иштер жүрүп жатат. Бул аракеттердин бардыгы келечекте Кыргызстанда атомдук энергетика өнүккөндө кадрлар жана илимий база даяр болушу үчүн жасалууда, — деди ал.
— Биз инженердик жана технология багытында билим алып жаткан студенттерге жана жаш кадрларга өзгөчө көңүл бурабыз. Ошондой эле “Росатом” Кыргызстанда атомдук медицина долбоорун ишке ашырып жатат. 2025-жылы Онкология жана гематология борборунда ядролук медицина бөлүмү ачылып, 500дөн ашуун бейтап текшерүүдөн өттү. Бул — Кыргызстандагы мындай деңгээлдеги алгачкы борбор жана мунун мааниси чоң, — деп кошумчалады Дмитрий Константинов.
Студенттерди илимге кызыктырган интеллектуалдык оюн
Ал эми аталган интеллектуалдык оюнга студенттерин даярдап келген Кыргыз улуттук университетинин Физика жана электроника факультетинин Техникалык физика кафедрасынын окутуучусу Гульмира Жумабаева мындай деди:
- Студенттеримди Global Atomic Quiz – 2025 викторинасына катыштырууга алып келдим. Бул иш-чара ядролук технологиялар тууралуу билимди жайылтууга жана жаштардын илимге болгон кызыгуусун арттырууга багытталганы абдан жакшы. “Росатом” өкүлдөрү дайыма биздин университет менен тыгыз кызматташып, студенттерге заманбап технологиялар боюнча пайдалуу маалыматтарды беришет.
Эгер келечекте Кыргызстанда атомдук энергетика өнүксө, азыртан билим алып жаткан студенттер бул тармактагы даяр адистер болот. Мындай викториналар жаштарды жаңы билимге, илим жана инновация тармагына кызыктырууга чоң түрткү берет.
Ал эми викторинага катышуу үчүн келген студенттердин бири, И.Раззаков атындагы Кыргыз мамлекеттик техникалык университетинин студенти Бегимай Молдошева иш-чара боюнча буларга токтолду:
-Мындай интеллектуалдык оюндар ар дайым жаңы тажрыйба, таанышуулар жана жагымдуу эмоциялар менен коштолот. Алар биздин ой жүгүртүүбүздү кеңейтип, креативдүү ойлонууга түрткү берет. Ошондуктан студенттер арасында мындай иш-чаралар көп өткөрүлүп турса абдан жакшы болмок. Албетте, биз жакшы даярдандык, бирок эң негизгиси — жеңиш эмес, жаңы билим жана баалуу тажрыйба алуу.
Татыктуулар сыйланды
Иш-чаранын соңунда викторинанын жыйынтыгы чыгарылып, орундар ыйгарылды. Жыйынтыгында И.Раззаков атындагы Кыргыз мамлекеттик техникалык университетинин студенттери:
1-орунду — Усупбеков Эрболот,
2-орунду — Жаныбек уулу Ажибек,
3-орунду — Арнистов Алишер ээледи.
Бардык катышуучуларга «Росатом» мамлекеттик корпорациясынын атынан белектер жана сертификаттар тапшырылды.
Ал эми эң жогорку упай топтоп, биринчи орунга татыган Усупбеков Эрболот өз таасирин мындайча бөлүштү:
— Викторинага жакшы даярдык менен келгем, бирок биринчи орунду алышым мен үчүн күтүүсүз болду. Бул менин келечекте илим менен технология тармагында дагы терең билим алууга болгон кызыгуумду күчөттү, — деди ал.
Маалымат үчүн: Global Atomic Quiz долбоору 2020-жылдан бери дүйнөнүн 70тен ашык өлкөсүндө өткөрүлүп, 11 тилде жүргүзүлөт. Ар жылы 40 миңден ашык адам катышып, долбоор илимди жайылтууга кошкон салымы үчүн “Илимге берилгендик үчүн” сыйлыгынын “Илим тынчтыкка” номинациясында белгиленген.
