Бишкек мэри көчөлөрдөгү оңдоо иштерин текшерди
Бишкек шаарынын мэри Айбек Джунушалиев шаардык кызматтардын жана коммуналдык ишканалардын өкүлдөрү менен бирге борбордук көчөлөрдөгү оңдоо жана курулуш иштеринин жүрүшүн текшерди. Бул тууралуу муниципалитеттен билдиришти.
Маалыматка караганда, Курманжан Датка көчөсүнүн Жибек-Жолу проспектинен Чүй проспектисине чейинки бөлүгүндө эки тарабында тротуар курулууда. Бул аймактагы иштер “Бишкек шаардык телефон тармагы”, “Түндүкэлектр” жана “Бишкек ЖЭС” орнотулган коммуналдык линияларды жылдыргандыктан кечеңдеп жатат. Мэр ишти беш күндүн ичинде бүтүрүүнү тапшырды, мөөнөт сакталбаса муниципалитет өз эсебинен аяктырмакчы.
Ошондой эле Джунушалиев веложолду сапаттуу куруу, П-түрүндөгү светофорлорду орнотуу, мыйзамсыз унаа токтотууга каршы көзөмөлдү күчөтүү жана Медеров көчөсүндөгү иштерди тездетүү тапшырмаларын берди.
Восточная көчөсүндөгү текшерүү учурунда тургундар коомдук транспортту жакшыртуу жана байланыш номерлерин тактоо боюнча кайрылышты. Мэр жеке өзү жооптуу кызматкерге чалып, тапшырмаларды аткарууну камсыз кылды.
Кыдыруунун соңунда мэр Ч.Айтматов проспектисиндеги жер алдындагы өтмөк, Фучик көчөсүндөгү тротуарлар жана мурда батирлерди суу каптаган жерлердеги калыбына келтирүү иштерин текшерип, сапатты жана мөөнөттөрдү так сактоону тапшырды.
