Муниципалдык унаа токтотуучу жайларга жол белгилерин чийүү уланууда
"Бишкекасфальтсервис" муниципалдык ишканасынын бригадасы борбордун муниципалдык унаа токтотуучу жайларына жол белгилерин чийүү боюнча иштерди активдүү жүргүзүүдө. Бул тууралуу шаардык мэриядан билдиришти.
Бүгүнкү күндө Турусбеков көчөсү боюнча Москва көчөсүнөн Жибек-Жолу проспектисине чейинки бөлүгүнө жаңы белгилер чийилип жатат.
Иштер муниципалдык унаа токтотуучу жайларды уюштурууга жана тартипти жогорулатууга багытталган. Буга чейин унаа ээлери унааларын башаламан токтотуп, бир эмес, эки унаа токтотуучу жайды ээлешкен.
Мэрия шаар тургундарын унааларды атайын токтоочу жайларда гана калтырууга жана токтоо эрежелерин сактоого чакырды.
