Ош шаарында ART EXPO эл аралык көргөзмөсү өтүп жатат
Ош шаарында Маданият, маалымат жана жаштар саясаты министрлигинин демилгеси жана Ош шаарынын мэриясынын колдоосу менен кечээтен тарта КМШга мүчө мамлекеттердин ART EXPO эл аралык көргөзмөсү өтүп жатканын “Кабар” маалымат агенттиги жазды.
Ачылыш аземине маданият министринин орун басары Союзбек Надырбеков жана Ош шаарынын мэринин орун басары Нурлан Закиров катышты.
Көргөзмөнүн алкагында Ош шаардык маданият башкармалыгы тарабынан даярдалган концерттик программа, КМШ өлкөлөрүнүн белгилүү дизайнерлеринин мода көрсөтүүсү, ошондой эле кол өнөрчүлүк жана сүрөт искусствосунун көргөзмөсү тартууланды.
ART EXPO эл аралык көргөзмөсү - бул КМШга мүчө мамлекеттердин маданият жана искусство тармагындагы жетишкендиктерин чагылдырган ири аянтча болуп саналат.
Бул ири эл аралык иш-чара Ош шаарын КМШ мейкиндигиндеги маданий борборлордун бири катары көрсөтүп, улуттук искусствонун жана маданияттын эл аралык деңгээлде таанылышына чоң салым кошууда. Көргөзмө 14-ноябрга чейин уланат.
