Бишкек мэриясы көңүл ачуу жайларынын ишин 22:00гө чейин чектеди
Шаар тургундарынын тынчтыгын камсыздоо максатында Бишкек шаардык мэриясы жаңы буйрук чыгарды. Бул чечим «Тынчтык жөнүндө» Мыйзамды жана жергиликтүү өз алдынча башкаруу тууралуу мыйзамдарды аткаруунун алкагында кабыл алынды.
Ведомствонун маалыматына караганда, шаардагы кафе, ресторан, бар, клуб, банкет залдары жана башка көңүл ачуу жайлары бардык иш-чараларын токтотуп, ишин саат 22:00дө аяктоого тийиш.
Ошондой эле 22:00дөн кийин электр энергиясын көп керектеген жабдуулар — электр мештери, жылытуучулар, тандырлар — толук өчүрүлүүгө милдеттүү. Катуу музыка коюу жана жарык берүүчү жабдуулар менен жарандардын тынчтыгын бузган иш-чараларды өткөрүүгө тыюу салынды.
Турак жайлардан алыс жайгашкан объектилерге жана мыйзамдын талаптары сакталган учурда электр генераторлорун колдонууга уруксат берилет.
Буйруктун аткарылышын көзөмөлдөө райондук администрациялар жана муниципалдык инспекцияга жүктөлүп, шаарда үзгүлтүксүз рейддер өткөрүлүп турат.
