Бишкекте таштандыларды кайра иштетүүчү заводго пилоттук жеткирүү болду
Бүгүг, Бишкекте таштандыларды кайра иштетүүчү заводдо катуу тиричилик калдыктарын биринчи пилоттук жеткирүү жасалды. Ишке киргизүүгө Жаратылыш ресурстары, экология жана техникалык көзөмөл министри Медер Машиев, Бишкек шаарынын мэри Айбек Джунушалиев жана башка расмий өкүлдөр катышты. Бул тууралуу мэриядан билдиришти.
Пилоттук жеткирүүдө 17 даана атайын техника рейске чыгып, жалпы 126 тонна таштанды заводго жеткирилди. Электр энергиясын өндүрүү процесси таштандылардын көлөмү 1 000 тоннага жеткенден кийин башталат.
Мэр Айбек Джунушалиев объектти өз көзү менен текшерип, курулуштун жүрүшү менен таанышты. Заводдун ачылышы 2025-жылдын 26-декабрында пландаштырылууда.
Долбоор 2023-жылдын ноябрында Бишкек шаарынын мэри жана Junxin компаниясынын башкы директору Дай Даогуо тарабынан кол коюлган келишимдин алкагында ишке ашырылууда. Инвестициялык долбоор Министрлер Кабинетинин 2024-жылдын 28-мартындагы №113 токтому менен бекитилген жана жалпы инвестициянын көлөмү 95 миллион АКШ долларын түзөт.
