Бишкектеги мыйзамсыз курулушка 423 миң сом айып салынды
Курулуш, архитектура жана турак жай-коммуналдык чарба министрлигине караштуу Бишкек шаарынын Мамлекеттик архитектуралык-курулуш контролдоо башкармалыгы курулуш объектилерин көзөмөлдөп, бир катар мыйзам бузууларды аныктады. Бул тууралуу министрликтин маалымат кызматынан билдиришти.
Текшерүүлөрдүн жыйынтыгы боюнча, Токмок көчөсү 45, 47 жана Загорская көчөсү 22, 24 дарегинде курулуп жаткан 9 кабаттуу турак үйлөрдө, ошондой эле Мичурин көчөсү 27 дарегиндеги 9 кабаттуу объектиде долбоордон сырткары курулуш иштеринин жүргүзүлгөнү аныкталды.
Натыйжада “Стальмонтаж плюс” ЖЧКсына карата акт түзүлүп, 423 миң сом өлчөмүндө айып салынды. Ошондой эле компанияга жазуу түрүндө эскертүү берилди жана лицензиясы курулуш объектиси долбоорго ылайык келтирилгенге чейин токтотулду.
Башкармалык курулуш-монтаж иштерин Кыргыз Республикасынын мыйзамдарына жана макулдашылган долбоорго ылайык аткарууга чакырып, материалдарды туура колдонуу, техникалык коопсуздукту сактоо жана курулуш ченемдерин так аткарууну эскертет.
