Эмгек министрлиги Дүйнөлүк банк менен социалдык кызматташтыкты күчөтөт
Эмгек, социалдык камсыздоо жана миграция министрлигинде министр Канат Сагынбаев Дүйнөлүк банктын Кыргызстандагы кеңсесинин жетекчиси Хью Риддел менен жолугушту. Бул тууралуу министрликтин маалымат кызматынан билдиришти.
Жолугушууда социалдык коргоо, калкты жумуш менен камсыз кылуу жана адамдык капиталды өнүктүрүү жаатындагы кызматташтыктын учурдагы абалы жана келечектеги багыттары талкууланды.
Министр Канат Сагынбаев Дүйнөлүк банктын социалдык тармактагы реформаларга кошкон салымын белгилеп, биргелешкен долбоорлор калктын жыргалчылыгын жакшыртууга чоң таасир эткенин айтты.
Учурда тараптар "Социалдык жардам жана эмгек рыногун чыңдоо" долбоорун ишке ашырып жатышат. Анын алкагында "Үй-бүлөгө көмөк" программасын өркүндөтүү, "Социалдык контракт" жана "Жаштардын стажировкалары" сыяктуу багыттар ишке киртилип, эмгек мигранттарынын реестри түзүлүүдө.
Хью Риддел өз сөзүндө Кыргызстандагы экономикалык өсүштүн жана жакырчылыктын кыскаруусунун оң динамикасын баса белгилеп, социалдык кызматтардын сапатын жогорулатуу маанилүү экенин айтты. Ал жаңы каржылоо долбоорлорун даярдоо иштери жүрүп жатканын кошумчалады.
Тараптар социалдык жактан аяр жарандарды колдоого багытталган кызматташууну мындан ары да улантууга даяр экенин билдиришти.
