Айыл чарба тармагы боюнча цифралар сүйлөйт
Кыргызстандын аймагында дан эгиндеринин 679,0 миң га аянтынан 673,5 миң га (99,2%) жыйналды. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, бул көрсөткүч өткөн жылга салыштырмалуу (658,1 миң га) жогору. Орточо түшүмдүүлүк 29,6 ц/га, жалпы өндүрүш 1 млн 994,6 миң тонна данды түздү.
Жашылча: 56,6 миң га аянттан 53,5 миң га (98,6%) жыйналды. Орточо түшүмдүүлүк 188,1 ц/га, жалпы өндүрүш 1 млн 6,8 миң тонна.
Картошка: 64,5 миң га аянттан 63,3 миң га (98,3%) жыйналды. Орточо түшүмдүүлүк 176,5 ц/га, жалпы өндүрүш 1 млн 176 миң тонна, өткөн жылга караганда өсүү байкалат (172,5 ц/га).
Бахча өсүмдүктөрү: Пландаштырылган 11,8 миң га аянт толук жыйналса, факты боюнча 12,2 миң га (103,8%)жыйынтык алынды. Жалпы өндүрүш 274 миң тонна, негизги өндүрүүчү — Жалал-Абад облусу.
Техникалык өсүмдүктөр: 32,3 миң га аянттан жыйноо уланууда. Май өсүмдүктөрү 12,2 миң га (96,9%), тамеки толугу менен жыйналды. Пахта — 19,0 миң тонна, кант кызылчасы 431,7 миң тонна (85,9%). Ошондой эле жүгөрү жана кант кызылчасын жыйноо иштери акыркы баскычта.
"Бул көрсөткүчтөр Кыргызстанда айыл чарба продукциясынын быйылкы жылы да туруктуу жана жогорку натыйжалуу болуп жатканын айгинелейт",-деп айтылат маалыматта.
