Айылдарды таза суу жана сугат суу менен камсыздоо иштери уланууда
Өлкөдө таза ичүүчү суу жана сугат суу менен камсыздоо боюнча ири долбоорлор активдүү жүрүп жатат. Бул багыт мамлекеттик саясаттын эң приоритеттүү тармактарынын бири катары Президенттин жеке көзөмөлүндө турат. Бул тууралуу Айыл чарба министрлигинин маалымат кызматынан билдиришти.
Учурда республика боюнча 119 айылда таза ичүүчү суу жеткирүү боюнча курулуш иштери аткарылууда. Жалпысынан 600 айыл таза суу менен камсыз кылуу программасына киргизилген.
Сугат суу тармагында да кеңири иштер жүрүүдө. Азыркы тапта 14 суу чарба объектинде курулуш жүрүп жатса, дагы 18 объект боюнча долбоорлоо иштери жүргүзүлүүдө.
2026-жылга чейин 55 ирригациялык объектти – насос станцияларын, каналдарды, БСР жана БДР сыяктуу маанилүү курулмаларды пайдаланууга берүү пландалууда.
Ошол эле учурда, Курултайдын делегаттары менен министрлик өкүлдөрү ар жума сайын жолугушууларды өткөрүп, жергиликтүү жамааттар тарабынан көтөрүлгөн маселелерди талкуулап, тиешелүү чечимдерди кабыл алууда.
