Эттин бааларын турукташтыруу боюнча онлайн кеңешме өттү
Бүгүн, 17-ноябрда Суу ресурстары, айыл чарба жана кайра иштетүү өнөр жайы министрлигинде Министрдин биринчи орун басары Ж.К. Керималиевдин катышуусунда онлайн форматтагы кеңешме өткөрүлдү.
Министрликтин маалыматына ылайык, кеңешмеге Монополияга каршы жөнгө салуу кызматы, шаардык мэриялар, жергиликтүү администрациялар жана базар жетекчилери катышты. Жолугушуунун жүрүшүндө азык-түлүк коопсуздугу, социалдык маанидеги товарлардын, анын ичинде уй жана кой этине болгон бааларды туруктуу кармоо маселелери талкууланды.
Жыйынтыгында, Кыргызстанда уй жана кой этине (сулп этинен тышкары) бааларды убактылуу мамлекеттик жөнгө салуу мөөнөтү 2025-жылдын 31-декабрына чейин узартылганы маалымдалды. Ошондой эле жергиликтүү органдарга фермерлерден түз жеткирилген эт менен калкты үзгүлтүксүз камсыз кылуу тапшырмасы берилди.
