Токмокто жаштар үчүн заманбап спорт комплекси курулуп жатат
15-ноябрда Курулуш, архитектура жана турак-жай коммуналдык чарба министри Нурдан Орунтаев Токмок шаарындагы бир катар курулуш объектилери менен таанышты. Иш-чара жаңы спорт комплекси курулуп жаткан аянттан башталды. Ага шаар мэри Алтынбек Эргешов жана тиешелүү кызматкерлер катышты. Бул тууралуу министрликтин маалымат кызматынан билдиришти.
Шаардын 3-кичи районунда курулуп жаткан спорт комплекси жаштар үчүн бардык шарттарды камсыз кылат. Жалпы аянты 1320 чарчы метрди түзгөн объектте кичи футбол аянтчасы, бокс жана күрөш залдары, машыктыруучулардын бөлмөсү жана кийинип-чечинүүчү жайлар каралган. Спорт комплекстин биринчи кабаты 200 көрүүчүгө ылайыкташтырылган, экинчи кабатында болсо стол тенниси үчүн зал жайгаштырылат.
Министр курулуштун сапатына өзгөчө көңүл буруп, объектти белгиленген мөөнөттө толугу менен бүтүрүүнү тапшырды.
Белгилей кетсек, спорт комплекстин курулушу быйыл июль айында УКМК төрагасы Камчыбек Ташиевдин тапшырмасы боюнча башталган.
